Nuuk 14. april 2011
Aalisarnermut inatsisip allannguutissai aalisartunut annertuumik iluaqusiissapput
Piginnittuunermut tunngasut kiisalu pisassiissutit qaffasinnerpaaffissaannik killiliinerup allanngortinnissaat aammalu aalisarnerup naleqqussarneqarnissaanut Inatsisartut aningaasatigut inatsisaatigut aaqqissuussassaq nutaaq aalisarnermik inuussutissarsiuteqartortatsinnut aammalu inuiaqatigiinnut kalaallinut annertuumik iluaqusiisussaapput
Naak massa aalisarnermut inatsimmi piginnittuunermut tunngasut allanngortinneqarnissaanut tunngatillugu aalisarnermik inuussutissarsiuteqartut illersorneqarnissaat pillugu inatsisitigut qularnaatsumik toqqammavissaqartitsisoqassanersoq ATASSUT-mit suli eqqarsarnartoqartitsigaluarluta, siunnersuutip siullermeerneqarnerani neriorsorneqarpugut aappassaaneerinninnginnermi apeqqut pillugu sukumiisumik qulaajaasoqassasoq.
Naak massa sinerissamut qanittumi aalisarnermi pisassiissutit qaffasinnerpaaffissaannik killiliineq 15 procentimut qaffanneqarnissaanut tunngatillugu ilumut sinerissamut qanittumi aalisarnerup ineriartortinneqarnissaanut ajunngitsumik iluaqusiissanersoq ATASSUT-mit eqqarsarnartoqartitsigaluarluta, siunnersuutip siullermeerneqarnerani neriorsorneqarpugut aappassaaneerineq sioqqullugu soqutigisaqartut tamarmik tusaaniarneqassasut.
Siunnersuut saqqummeqqaarmat assut isorinnilluta aammalu imaaliinnarlugu akuersaaruminaatsillugu inissisimanerput ATASSUT-mit miserratiginagu ersersipparput, tassungali uniinnarata toqqarparput aalisarnerup siunissami aaqqissuussaanissaa pillugu Naalakkersuisut oqaloqatigiinnissamik isaassinerat atorluarniarlugu, tamannalumi kinguneqarluarpoq, massakkummi, ukiorpassuanngortuni siullermeerutaasumik, sinerissamut qanittumi aalisarnerup nalimmassarneqarnissaanut suliniutit piviusorsiortut timitalerneqarsinnaasullu siunniunneqarput. Tamannalu qulakkeerneqassaaq Inatsisartut aningaasanut inatsisaatigut 2012-moortukkut.
Naammagisimaakkatsinnik Naalakkersuisooqatigiit taperserpaatigut aalisarneq siunissami imatut aaqqissugaasariaqartoq ullumikkut aalisarneqartut kisiisa isumalluutiginagit, pisuussutilli ullumikkut atorluarneqanngitsut ullumikkumiit annertunerusumik inerisaavigineqarnissaannut inatsisitigut aningaasatigullu sinaakkutassat aallunneqassasut. Tamanna ajunngitsuinnarmik inerneqarsinnaavoq!
Inatsisartuni amerlanerussuteqarluartut aalisarnermik inuussutissarsiornerup nutarterneqarnissaanik alloriartoqassasoq akuersaartut, ilaqararpugut iliuuseriniarneqartunut isumalluarnermik pissutissaqannginneraasunik, taamaakkaluartoq ATASSUT-mit alloriarneq tamanut iluaqutaasussanngussasoq qularutiginngilarput.
Soorunami aalisarnermik inuussutissarsiuteqartut ullumikkut ingerlataqareersut kiffaanngissuseqarput aalisarnertik qanoq ingerlatissanerlugu namminneq aalajangersaassallutik, kiffaanngissuseqarnerallu taanna allanngortinneqarnavianngilaq aalisarnermut inatsit allanngortinneqaraluarpalluunniit, paarlattuanilli, ullumikkumit annertunerusumik kiffaanngissuseqarnerulissapput soorlu assersuutigalugu nutaanik ullutsinnullu naleqqunnerusunik angallatitaarniarnerminni namminneq aalajangersinnaassavaat aningaasaleeqateqarlutik tamanna ingerlakkumanerlugu.
Taamatuttaaq pisassiissutit qaffasinnerpaaffissaannik killiliinerup allanngortinneratigut anginerusunik aammalu ullutsinnut naleqqunnerusunik angallateqalernissamut kajungilersitsinerussasoq naatsorsuutigineqartariaqarpoq.
Oqareernitsitulli, allannguutissatut siunnersuutip aappassaaneerneqannginnerani inaarutaasumillu aalajangiisoqannginnerani suliaq annertooq ingerlanneqartussaavoq, taamaaliornikkut qulakkeerniarneqartussaavoq inatsisitigut sinaakkutaalersussat isumannaatsuullutillu attanneqarsinnaanissaat, ATASSUT-millu Inatsisartut Aalisarnermut Ataatsimiititaliaat tatigilluinnarparput suliassaq pitsaasumik assuarnaatsumillu Naalakkersuisut suleqatigalugit naammassiniarumaaraat.
Naggataatigut Siumumut kaammattuutigiinnassavarput, uagutsitulli, sapinngisamik annerpaamik tikkuinnaratik sunniuteqarniaqqullugit.
Inussiarnersumik inuulluaqqusilluta
Gerhardt Petersen Siverth K. Heilmann Knud Kristiansen
Siulittaasoq Siulittaasup tullia Inatsisartut Aalisarnermut Ataatsimiititaliaani ilaasortaq