Inatsisartut suleriaasianni § 32 naapertorlugu aalajangiiffigisassatut siunnersuut imaattoq matumuuna saqqummiupparput:
Inuit/ingerlateqatigiiffiit nunaqavissut ujaqqanik pinnersaasiassanik inuussutissarsiutigalugit ingerlanneqarsinnaanerat siuarsaavigineqarsinnaaqqullugu siunnersuineq tapersersuinerlu annertusarneqarnissaat siunertaralugu Naalakkersuisut sulissuteqaqqullugit peqquneqarnissaannik Inatsisartut aalajangiiffigisassaattut siunnersuut.
(ATASSUT-ip Inatsisartuni ilaasortaatitai: Siverth K. Heilmann, Knud Kristiansen)
Tunngavilersuut:
Inuiaqatigiinnut kalaallinut siuariarnerujussuuvoq Kalaallit Nunaanni pisortat nunap pisuussutaanik piginnittussaaneq qulakkeermassuk matumanilu akisussaaffiit ingerlatsinerlu nunatsinnit tiguneqarmata. Taamattorli tamanna immini naammanngitsoq ATASSUT-mit isumaqarpugut.
Inuiaqatigiimmi Kalaallit pisuussutit uumaatsut annerpaamik iluaqutigissappatigit iluanaarutigalugillu isumarput naapertorlugu ingerlatseqatigiiffiit nunatsinneersut annertuumik piiaanermik pisuussutinillu nioqqutissiornermik ingerlatsisariaqarput, matumani pingaartumik eqqarsaatigalugit ujaqqat pinnersaasiassat erlinnartut.
ATASSUT-mit isumaqarpugut ingerlatseqatigiiffinngorumaartunut aatsitassarsiornermik misissueqqaarnermik piiaanermillu ingerlataqalertussanut pisortat ernisussiortutut inissinnissaat pissusissamisuussasoq, matumani pingaartumik ujaqqat pinnersaasiassat eqqarsaatigalugit.
Aatsitassanut ikummatissanullu inatsisip § 45-anut oqaaseqaatini nalinginnaasuni allassimavoq innuttaasut nunaqavissut immikkut akuersissuteqaqqaarnani ukiumut 100.000 kr.-it angullugit naleqartunik aatsitassanik katersisinnaasut piiaasinnaallutillu. ATASSUT-miit isumaqarpugut tamanna naammanngitsoq, innuttaasullu nunaqavissut pingaartumik ujaqqanik pinnersaasiassanik inuussutissarsiutigalugu annertunerusumik atuisinnaanerat periarfissinneqartariaqartoq.
Tamanna qulakkeerneqarsinnaaqqullugu matumuuna inuit/ingerlateqatigiiffiit nunaqavissut ujaqqanik pinnersaasiassanik inuussutissarsiutigalugit ingerlanneqarsinnaanerat siuarsaavigineqarsinnaaqqullugu siunnersuinerup tapersersuinerullu annertusarneqarnissaat siunertaralugu Naalakkersuisut sulissuteqaqqullugit peqquneqarnissaannik Inatsisartut aalajangiissasut siunnersuuteqarpugut.
Taamatut tunngavilersuuteqarluta siunnersuut Inatsisartunut suliassanngortipparput.