|
UKA 2010/81
Inatsisartut suleriaasianni § 32 naapertorlugu aalajangiiffigisassatut siunnersuut imaattoq matumuuna saqqummiupparput:
Inissianik sanaartornermut tapersersuisarneq taarsigassarsisitsisarnerlu pillugit inatsisini seqerngup maligaasaanik aammalu nukissiuutinik ataavartunik allanik atortulersornissamut aningaasartuutit ilaannik matussusiissutissanik taperserneqarnissamik periarfissaqalersitsinissaq siunertaralugu Naalakkersuisut sulissuteqarnissaannik Inatsisartut aalajangiiffigisassaattut siunnersuut
(ATASSUT-ip Inatsisartuni ilaasortaatitai: Finn Karlsen, Siverth K. Heilmann, Knud Kristiansen)
Tunngavilersuut:
Ilisimaneqarpoq CO2-mik aniatitsinitta millisarneqarnissaannut pisussaaffitsinnik naammassinninniarnerput inuiaqatigiit uagut assut ajornartorsiutigigipput. Pisussaaffipput naammassiniarlugu iliuuseqarnerput pillugu nunat avatitsinniittut tatiginninnerat annertusarniassagutsigu inuiaqatigiittut tiguussaasunik iliuuseqartariaqarpugut.
Inissianik allanillu sanaartornermi tapersersuisarnermut taarsigassarsisitsisarnermullu inatsisini atuuttuni, nukissiuutinik ataavartunik innaallagissamik kiassarnermillu pilersorneqarnissamut periarfissaqartitsisoqanngilaq.
Aaqqissuussinermi taarsigassarsiniartoq tapiissutinillu qinnuteqaateqartoq periarfissinneqarpat seqerngup maligaasaanik, seqerngup kissarneranik igalaanik kiammik tigooqqaasartunik (energiruder) pilerneqarnissaminut atatillugu taperneqarnissamik qinnuteqaateqarsinnaatitaalerpat, tamanna iluanaarutissanik arlalinnik kinguneqassaaq, atuisunut ataasiakkaanut innaallagissamut imermut kiassarnermullu akiligassat annikillisinneqassapput taamatuttaaq mingutsitsinermik aniatitsinitta annikillisarneqarnissaannik pisussaaffitsinnik naammassinninniarnitsinnut annertusaataassaaq.
Tamakkuninnga tunngavilersuuteqarluta inissianik sanaartornermut tapersersuisarneq taarsigassarsisitsisarnerlu pillugit inatsisini seqerngup maligaasaanik aammalu nukissiuutinik ataavartunik allanik atortulersornissamut aningaasartuutit ilaannik matussusiissutissanik taperserneqarnissamik periarfissaqalersitsinissaq siunertaralugu Naalakkersuisut sulissuteqarnissaannik Inatsisartut aalajangiiffigisassaannik siunnersuuteqarpugut.
|