Inatsisartut suleriaasianni § 32 naapertorlugu aalajangiiffigisassatut siunnersuut imaattoq matumuuna saqqummiupparput:
Inatsisartut aningaasanut inatsisaanik toqqammaveqarluni erhvervsstøttemi puljemik pilersitsinissaq siunertaralugu inatsisissatut siunnersuummik suliaqaqqullugit Naalakkersuisut peqquneqarnissaannik Inatsisartut aalajangiiffigisassaattut siunnersuut (ATASSUT-ip Inatsisartuni ilaasortaatitai: Siverth K. Heilmann, Knud Kristiansen)
Tunngavilersuut:
2009-mi qinersineq sioqqullugu Inatsisartut 2008-mi ukiakkut ataatsimiinneranni partiit tamarmik aalajangiuppaat erhvervsstøttepuljemik pilersitsisoqassasoq (UKA2008/54), aalajangiinerli pereermat Naalakkersuisuusimasut siunnersuummik saqqummiussissallutik angumersinngitsoorput 2008-mi upernaakkut Inatsisartunut qinersinissaq nalunaaruteqarmat.
Erhvervsstøttepuljemik pilersitsinissami siunertaavoq aningaasanut inatsit aqqutigalugu ataasiartumik aningaasaliisoqassasoq, aningaasallu taarsigassarsiaritinneqartut taarsersorlugit akilersorneqartut erniai ilanngullugit Erhvervsstøttepuljemi attartorteqqitassatut atorneqartassasut, tassa massakkutut nunap karsianut akilersorneqaratik.
Ukiuni kingullerni arlalinni Erhvervsstøttemut aningaasaliissutigineqartartut annikilliartupiloornikuupput. Tamatta ilisimavarput pingaartumik aalisarnermik inuussutissarsiuteqartut angallatiminnik nutarsaanissaminnik pisariaqartitsisut, tassami angallatit tamakku amerlanersaat ullumikkut pisoqalinikuupput aserfallatsaaliornerallu akisoqaralutik.
Puljemik taamaattumik pilersitsisoqarnissamut arlalinnik pingaarutilinnik pissutissaqarpoq:
- Inuussutissarsiutinut taperseeriaaseq patajaatsoq ukiumoortumillu aningaasalersorneqarnissamut pisariaqartitsinngitsoq pilersinneqassaaq.
- Inuussutissarsiutinut taperseeriaaseq patajaatsoq inuussutissatigut immitsinnut pilersornerulernissatsinnut annertusaataassaaq.
- Inuussutissarsiutinut taperseeriaaseq patajaatsoq aalisarnermik, piniarnermik aammalu nunalerinermik inuussutissarsiutit imminut akilersinnaanerusunngorsarneqarnerannut annertusaataassaaq.
Taamatut tunngavilersuuteqarluta siunnersuut Inatsisartunut tunniupparput.