|
UKA 2010/84
Inatsisartut suleriaasianni § 32 naapertorlugu aalajangiiffigisassatut siunnersuut imaattoq matumuuna saqqummiupparput:
Inersimasunik ilinniartitsisarneq pillugu Namminersornerullutik Oqartussat nalunaarutaat nr. 25, 7. december 2000-imeersumut allannguutissatut siunnersuut, taamaalilluni nalunaarut malillugu §2 imm.1-imi piumasaqaataasup ilinnialerniarluni qinnuteqartussap 30-inik ukioqalereersimanissaata ukiunut 26-inut appartinneqarnissaanik naalakkersuisut sulissuteqaqqullugit peqquneqarnissaannik inatsisartut aalajagiiffigisassaattut siunnersuut.
(ATASSUT-ip Inatsisartuni ilaasortaatitai: Siverth K. Heilmann, Knud Kristiansen)
Tunngavilersuut:
Nunatsinni najungaqartut amerlanerpaat ilinniangaqarsimanissaat anguniarneqarpoq, inuussutissarsiutinullu ilinniarniarluni ukiut 30-init ukiunut 26-inut appartinneqarneratigut Atassut-miit isumaqarpugut tamanna nunatsinni ilinniarusuttut amerlanerulernerannik kinguneqassasoq.
Inuusuttorpassuit 30-it inorlugit ukiullit ilinniagaqarniaraluarlutik amerlasuutigut aporfigisarpaat ilinniagaq nalinginnaasumik aallartissagunikkut ilinniarnermik nalaani aningaasarsiat nalinginnaasut ulluinnarni inuuniarnermi nammassinnaaneq ajormassuk, ilaatigut tassani peqqutaallutik meeraqalereersimaneq namminerlu inigisaqalereersimaneq. Massakkullu ilinniartunut inigitinneqartartut annertuumik amigaataanerisigut Atassut-miit isumaqarpugut nammineerlutik angerlarsimaffeqareersut tassuuna aamma ilinniagaqarnissaamut periarfissinneqassasut, ulluinnarni inuuniarnerannut artukkiinngitsumik.
Nunatsinni sanaartugassat annertuumik nunani allani suliffeqarfissuarnit sanaartorneqarput, naak nunatsinni annertuumik suliffissaaleqisoqaraluartoq. Nunatsinni ilinniarnissamut periarfissanik pitsanngortitsinikkut nunaqavissut amerlanerusut sanaartornerup iluani sulisorineqalissapput.
Taamatut tunngavilersuuteqarluta siunnersuut Inatsisartut suliassanngortipparput.
|