|
Kalaallit Nunaanni folkehøjskolit pillugit Inatsisartut inatsisissaattut siunnersuut
(Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq)
ATASSUT-miit inatsisissatut siunnersuut misissorluareerlugu imatut oqaaseqarfigissavarput:
ATASSUT-mi ilinniartitaanerup ineriartortinneqartuarnera pingaartillugu suleqataaffigiuarsimavarput, aamma maannakkut piareersarfiit pilersinneqarnerini nalilersuinerit siulliit takusinnaalereerlutigit.
Nunatsinni ilinniartitaanikkut ataqatigiissumik suliniutit inerisartuarneri pisariaqartut takujuarparput. Aamma kolligianik sanaartorneq eqqarsaatigalugu.
Folkehøjskolit ilinniarfiit pioreersut pisariaqartitsinerat aallaavigalugu ilinniartitsisinnaanerat uani periarfissanngussaaq, taamaasillunilu ilinniartoqarfinnik pioreersunik suleqateqarnikkut tamanna naammassineqarsinnaassalluni.
ATASSUT-miit inatsisissatut siunnersuut akueralugu tapersersorparput, isumaqaratta tamanna mannakkut ilinniartoqarfiit pisariaqartereeraat, taamaasillunilu ilinnialersartut amerlanerit tiguneqarsinnaalissammata, aallartissinnaalissammata. Tamassumallu aamma kingunerissallugu siunissami ilinniagaqarlutik ingerlaqqittartut, naammassinnittartullu amerlanerulernissaat.
ATASSUT-miillu erseqqissaatigissavarput, soorlu inatsisissami aamma qulakkeerniarneqartoq pingaaruteqarluinnarmat, tassalu folkehøjskolit namminiussuseqarnerat innarlerneqassanngitsoq, taamatullu aamma ilinniarfiit pioreersut soorunami taakkuummata tunngaviusumik atuuttut.
Taamatullu ATASSUT-miit pingaartillugu oqaatigissavarput, aningaasatigut malitsissai nalilersorluaqqinneqassasut, inatsisissap nassuiaataani aningaasartuutinik immikkut kinguneqartussaanngitsutut nalilerneqaraluartoq, ATASSUT-mit isumaqaratta soorunami tamanna folkehøjskolit, ilinniarfiillu aningaasartuuteqarnerulernerannik kinguneqassammat, ilinniartut amerlippata.
Taamatut oqaaseqarluta inassutigissavarput inatsisissap aappassaaneerneqartinnagu kultureqarnermut ataatsimiititaliamut ingerlatinneqassasoq.
|