BorderLayoutBoxedLayoutOpenLayout Maximum textMedium textSmall text


Atuisunngorit
24. juli 2014
 Kalaallisut (Kalaallit Nunaat) Dansk (Danmark)
dansk (Danmark)

 

 

 

2011-mut Inatsisartut aningaasanut inatsisissaannut siunnersuut
(Aningaasaqarnermut Naalakkersuisoq)
 
2011-imut Inatsisartut aningaasanut inatsisissaannut siunnersuut ATASSUT-mi misissorparput, imatullu oqaaseqarfigissallugu:
 
2010-mut Inatsisartut aningaasanut inatsississaannut siorna ATASSUT-miit Naalakkersuisut saqqummiussinerannut uparuaavugut, inuiaqatigiinnut annertoorujussuarmik sipaarniarfigineqarnerat, pingaartumik nunaqarfinni avinngarusimasunilu innuttaasut eqqornerlunneqarsinnaanerat eqqaallutigu.
 
Aningaasanut Inatsisissap naammassinissaanut tunngavilersuutigineqartut kusassagaasimanera urullatigaarput siunertaqarpianngitsutullu nalilerlutigu.
 
Ippassaq ammaanermi oqallinnermi ATASSUT-miit oqaaseqaatigut innersuussutigissavagut, suleriaqqinnissamilu uparuartuutit kaammattuutillu ilanngullugit nalilersullaqqussallutigit. Saqqummiussagummi aamma partiinit allaniit piffissaq akissuteqarnissamut sivikitsuinnaammat.
 
Taamatut ATASSUT-miit aallarniuteqarpugut, sulilu anersaaralugu aningaasanut inatsisissap tamatsinnut inooqataaffiusumik qanillattornissamullu piumassuseqarfigineqarluni naammassineqarumaartoq.
 
ATASSUT-miit oqaatigeriissavarput aningaasanut inatsisissaq taamatut isikkoqartillugu Naalakkersuisunik saqqummiunneqartoq ATASSUT-miit tamakkiisumik akuersaarsinnaannginnatsigu.
 
Akuersaarusunnginnitsinnut tunngaviunerpaavoq sipaarutaasinnaasunik ujaasinissaq annerusumik samminnagu, innuttaasut aningaasartuuteqarnerulernissaannut Naalakkersuisut atorusunnerugaat. Taamatut periuseqarniarneq iluatsissappat kingunerissavaa inuiaqatigiinnut aningaasartuutit qaffakkaluttuinnarnissaat, tamannalu ATASSUT-miit assut ernumanartutut nalilerparput.
 
Naalakkersuisut isertitaqarnerunissamik siunnerfigisaasa pingaarnersaraat ikummatissanik akitsuutip ukiumut 42 mio. Kr.-inik isertitaqaataasinnaasoq.
 
Ikummatissanik akitsuutip atuutilersinneqarneratigut qularutissaanngitsoq aana, inuppassuit minnerunngitsumik imaani inuussutissarsiortut ilungersoreeqisut nunamilu suliffiutillit namminersortut ingerlaniapilooreeqisut eqqornerlunneqarnissaat.
 
Aalisariutaatillit aalisakkanut assigiinngissitaartunut 1.500 kr.-neertalernissaat, umiatsiaararsortullu tunisaqartarnerminni ataasiartumik 1.500.-kr.-inik akiliuteqartalernissaat Naalakkersuisut partiiviniik amerlanerussuteqartitsinikkut aalajangerneqareerput atuutilersinneqareerlunilu.
 
Ulluni makkunani aalisartortatta piniartortattalu atugaat ilungersunartut akiluttornermut, pisassanik amikkisaartinneqarnernut tunitsiveqarniarnikkullu ilungersunartorsiortinneqarnernut aalisartorpassut kattuffiillu suaaruteqartuarnerat maluginngitsoorneqarsinnaanngilaq.
 
Susoqarpali Naalakkersuisut pingaartumik qaleralinnut eqqartorneqaqisunut pisassiissutinut nuussilaartaraluarlutik pisasseeqqinissamut piumassusiat huraartuutissaanngilluinnartoq, biolog-immi inassutaat aalisartut tusaanagit iliuuseqarnissartik Naalakkersuisut orniginartinneruvaat.
 
Tamannalu ATASSUT-miit aalisartorpassuit pilersugallit, akiligassanullu uninnavianngitsunut piumassusikinnerat ernumanarluinnartutut ATASSUT-miit nalilerumavarput.
 
ATASSUT-miit Naalakkersuisut kaammattorumavagut piaarnerpaamik suaartaatigineqartunut susassaqartut peqatigalugit iliuuseqaqqullugit, kiisalu aalisakkanik allanik tunisassiarineqarsinnaasunik periarfissarsiuussinissamik aqqutissiuussiniaqqullugit. ATASSUT-miillu immersueqataanissamut suleqataarusussuseqarnerput matumuuna nalunaarutigaarput.
Pingaartumik akissaatikitsut nunatta avataanut angalallatuarnerminninni, nioqqutissanik akitsuuteqanngitsunik pisiniarsinnaaneq periarfissanguaq nuannaarutigalugu atorluartarpaat. Taamaattumik Kalaallit Nunaannut tikinnermi akitsuuteqanngitsunik mattussiniarneq ATASSUT-miit akueriuminaatsipparput. Kiisalu qularaarput ukiumut Naalakkersuisut 20 mio.-kr.-inik isertitsissutaajumaarneranik naliliinerat.
 
Qamutit motoorillit akitsuutaasa qaffanniarneqarneri pingaartumik namminersortunut nunami suliffiutilinnut mikinernut qaffaanerup artukkiisinnaanera ATASSUT-miit ilungersuatitsilersinnaanera Naalakkersuisunut inatsisartunullu eqqarsaatigeqqussavarput.
 
ATASUT-miit aningaasanik ikisilluni pinnguaatinut akitsuutip qaffanneqarsinnaanera annertunerusumik akerliuffiginissaanut pissutissaqarsorinngilagut.
 
ATASSUT-miit Naalakkersuisut inatsisartullu kaammattorusuppagut, pisuussutinik uumassusilinnik pimoorunnerullugu aningaasarsiornissamut suliffissaqartitsinissamullu periarfissarsiuussinissamut aqqutiginiaqqullugu ATASSUT-miillu suleqataassaagut.
 
ATASSUT-miit qularutiginngilarput aalisartut, kattuffiit tunisassiorfiillu suleqatigiilluarnerisigut akileraarutinik isaatitsiviusinnaasunik aalisakkanik tunisassiarineqarajunngitsunik periarfissiinerunissamut pimoorussinerusariaqartut.
 
Taamatummi iliornikkut, aalisanik piujuartitsinissamut assersuutigalu qaleralinnut siunertap illersornissaanut aqqutissiuusseqataassagatta. Tassanili aalisartut tunisassiorfiillu peqataanissaat siunnersuisinnaanerallu saneqqunneqarsinnaanngilaq.
 
Kiisalu aammaarluta aatsitassarsiornerup iluani periarfissat suliffissanik aningaasarsiorfissanillu nutaanik annertuumik pilersinneqarsinnaasut eqqarsaatigalugit, aatsitassanut inatsisip naammassivinnissaanut sukkanerusumik Naalakkersuisunik naammassiniaqqullugu.
 
Kiisalu ATASSUT-miit aatsitassanut ataatsimiititaliap pilersinneqarnissaanut isumaqataanerput matuimuuna nalunaarutigeqqissavarput.
 
Tamakkuusinnaapput ATASSUT-miit aningaasanut inatsisissap siullermeerneqarnerani oqaloqatigiinnermut aallarniutitut akitsuutinik inuussutissarsiutinut inuuniarnermullu eqquinngitsunik pilersitsisoqarsinnaanerinut aqqutissaq.
 
Aammalu Namminersorlutik Oqartussani allaffissornikkut aningaasartuutit suli ikilisinniarneqarnissaanut pimoorullugu suliniuteqartariaqartugut ATASSUT-miit oqaloqataaffigerusupparput.
 
Kontomi pingaarnermi 20 05 20-mi, Kommuninut ataatsimoortumik tapiissutit, 2010-mut sanilliullugu 49,1 mio.kr.-inik appaasoqarnissaa siunnersuutigineqarpoq. Naluneqanngitsutut kommunit aningaasaqarniarnermikkut ullumikkut annertuumik naak ajornartorsioraluareeqisut.
 
Kommuninut tapiissutit apparteqqinnerisigut kommunit aningaasaqarniarnermikkut suli ajornartorsiornerulissapput. Taamaammallu kommuninut ataatsimoortumik tapiissutit ikilisinneqarnissaat pissusissamisuunngitsutut ATASSUT-miit isigaarput.
 
Nunatta karsiata aningaasanik tigoriaannarnik pisariaqartitsinera nunanit allanit aningaasanik taarsigassarsiniarneranut atatillugu, ersarissaalluartoqarnissaa Naalakkersuisut ATASSUT-miit kaammatussavagut.
 
Taamatut oqaaseqarluta aningaasanut inatsisissatut siunnersuutip aappassaaneerneqannginnerani Aningaasaqarnermut Ataatsimiititaliamut nalilersugassanngorlugu ingerlateqqinnissaa innerssuussutigaarput.
 
 

 


Atassut Landsorganisation - Postboks 399 - 3900 Nuuk - atassut@atassut.gl