24. maaji 2011
Inatsisartut suleriaasianni § 37, naapertorlugu matumuuna imaattumik Naalakkersuisunut apeqquteqarpugut:
Apeqqut: Upernaviup kujataa-tungaani avataanilu qalorsuarnik raajarniarneq periarfissaq akuerisaasoq, sumut killeqarpa? Aammalu sumiffinni taakkunani ukiuni kingullerni 10-ni raajat qalorsuarnik raajarniarfigineqarnerani qanoq annertutigisut pisarineqarpat?
(Inatsisartuni Ilaasortat, Knud Kristiansen, Siverth K. Heilmann, ATASSUT)
Tunngavilersuut:
Aalisartunit ATASSUT-mi ilisimatinneqartarnerput paasissutissanillu apuussiffigineqartarnerput maannamut oqariartuutigineqarput, saarulliit allaat kangerlunni pisarineqartartut, amerlasoorujussuit raajanik angisuunik aqajarormioqartartut, kangerlunnilu raajanik amerlasuunik naammattoorsiffiusartoq. Ukiut siuliini misileraanerit ingerlanneqartartut amerlanertigut nalilersuiffiginerini immap naqqata natilunnera ajornartorsiutitut nalilerneqartarmat.
Maannamut qalorsuit raajarniarnermi atortut nutaanngoriartornerini atortut immap naqqani natilukkaluami atorsinnaasut periarfissaalernerisigut ATASSUT-miit isumaqarpugut, siornatigut raajarniarfiunngitsut aamma periarfissanngortut, tamannalu aamma Upernaviup kujataa-tungaa, avataalu ilanngullugu.
---------------------------------------------------------------------------------------------------------------------------------------
19. maaji 2011
Inatsisartut suleriaasianni § 37, naapertorlugu matumuuna imaattumik Naalakkersuisunut apeqquteqarpugut:
Apeqqut: Nunatsinni angajoqqaarsiat (proffessionelle plejeforældre) qassiuppat? Ukiumullu maannamut qassit angajoqqaarsianngortarpat? Angajoqqaarsiallu suut ilinniagaraat? Maannamut angajoqqaarsiat akissaataat qanoq inissisimappat?
(Inatsisartuni Ilaasortat, Knud Kristiansen, Siverth K. Heilmann, ATASSUT)
Tunngavilersuut:
Nunatsinni meeqqat isumassorneqarneranni pingaaruteqarluinnartutut ATASSUT-miit isigaarput, angajoqqaarsiat meeqqanik paaqqinnittussat pitsaasumik isumaginninnermut, perorsaanermulluunniit attuumassuteqartumik ilinniagaqarsimasuunissaat, immikkuullarissunik akuersinngikkaanni (sumiiffiit ilaanni sussaaleqineq aallaavigalugu immikkut tatigisanik akuersinngikkaanni).
ATASSUT-miit pingaartilluinnarparput, inuiaqatigiit naleqartitaat, pingaartitaallu tunngavigalugit meeraq angerlarsimaffiup avataanut inissinneqartoq perorsarneqarlunilu isumassorneqassasoq, taamaasilluni angerlarsimaffiup avataanut inissiisoqaraluartoq isumassorneqarnera pingaarnerpaajuassammat.
ATASSUT-miit isumaqarpugut angajoqqaarsiat akisussaaffimmik tigusisarnerat meeqqanut pineqartunut pingaarutilerujussuusut, pingaartumik meeqqap angerlarsimaffimmi toqqissisimanartumi peroriartornissaq, isumassorneqarluni inuuneq, killeqarluni isumagineqarneq (unnukkut innarfissap killinga, neriffissat piffissat aalangersimasut, angerlarsimaffimmi peqataaneq il.il.) meeqqap “ilusilersorneqarnerani” aalajangiisorujussuit angajoqqaarsiat akisussaaffigilertarmassuk, pingaaruteqartorujussuuvoq pikkorissarnikkut neqeroorfigiuarnissaat, oqaloqatigineqarnissaannut, akissaatitigullu ajunngitsumik inissisimanissaat isumannaaruttariaqartut. ATASSUT-imi isumaqarpugut, suliffinnut allanut nallersuutissallugit naleqqutinngitsoq, perorsaaneq, “angajoqqaatut” inissisimaneq allatorluinnaq isigisariaqarmat.
ATASSUT-miit pingaartilluinnarparput sapinngisamik ilinniagaqassutsikkut perorsaanermut akisussaaffimmillu paarinnilluarsinnaanermik qulakkeerinnissinnaaneq angajoqqaarsianngortussat naammassisassagaat, aammalu akisussaaffik imaannaanngikkaluaqisoq suli amigaateqaqigatta angajoqqaarsiassanik pinngitsoorani akissaatinut tunngasut patsisaaqataasut ATASSUT-mit isumaqaratta.
---------------------------------------------------------------------------------------------------------------------------------------
19. maaji 2011
Inatsisartut suleriaasianni § 37, naapertorlugu matumuuna imaattumik Naalakkersuisunut apeqquteqarpugut:
Apeqqut: Avannaanut upernaakkut pilersuinermut umiarsuit (forsyningsskibe) siusinnerusukkut pajuttalernissaat Naalakkersuisut qulakkeerniarpaat?
(Inatsisartuni Ilaasortat, Knud Kristiansen, Siverth K. Heilmann, ATASSUT)
Tunngavilersuut:
Ukiut kingullerni sikuunikinnerusalernerata kinguneranik avannaani umiarsuit pajuttut siusinnerusukkut ukiut tamaasaanngikkaluartoq tikittarput, tamanna nioqqutissaqarnikkut, minnerunngitsumillu tunitsiviit ulikkaaqqasut tunioraavigineqaleqqissinnaanerannut tamanna pingaaruteqartarpoq.
Maannakkut avannaani pingaartumik Upernavik eqqaanilu nunaqarfiit eqqarsaatigalugit nioqqutissatigut annertuumik amikkisaarneqarpoq, aammalu tunitsiviit ulikkaaqqasut pissutigalugit aalisartut tuniseqqissinnaanngillat, taamaasillutillu aamma aningaasarsiornerat tassuunakkut eqqorneqarpoq. ATASSUT-miit isumaqarpugut upernaakkut umiarsuit siusinnerusukkut pajuttarsinnaanerat isumaliutigisariaqartoq, taamaasilluni nioqqutissaqarnikkut, tunitsiviillu avammut nassiussassaat toqqorsivinni utaqqisut piaarnerusumik tunisanik tigooraaqqilernerusinnaanerannik kinguneqartussaammat.
--------------------------------------------------------------------------------------------------------------------------------------
6. april 2011
Inatsisartut suleriaasianni § 37, immikkoortoq 1 naapertorlugu matumuuna imaattumik Naalakkersuisunut apeqquteqarpugut.
Apeqqut: Kalaaliminernik nassarluni taquarluniluunniit kilissatinut ikiartorlutik Island-ip timmisartunut mittarfeqarfiani arsaarneqartarneq anigorniarlugu qanoq Naalakakersuisut suliniuteqarniarpat?
(Inatsisartuni ilaasortat, Siverth K. Heimann, Knud Kristiansen, ATASSUT)
Tunngavilersuut:
Qulaani qulequtaq naatsoq ersarissorlugu pillugu Atassut-miit ilisimatinneqarpugut, kalaaleqatigut kilisaatini inuttat Nunatsinniit paarlaakkiartorlutik, Island-ilu aqqusaarlugu timmisartut mittarfianni kalaaliminernik nassataminnik, taquatulluunniit taaneqarsinnaasunik arsaarneqartarsimasut. Ilami allaat aggerfimminnut nassiunneqaannartarsimasut.
Politikkikkut nunat sanilerisagut suleqatigiinnerunissaat annertusiartortumik pitsaasumillu ingerlasutut oqaatigineqarsinnaavoq, taamaakkaluartorli nammineq nerisagut mamarisagullu kilisaammi inuttaalluni nerisassatut nassatat arsaarinnissutaasarneri qaangerniarlugu Naalakkersuinikkut sulissutigineqassanersoq Atassut-miit apeqqutigissavarput?
Naalakkersuisut akissutissaat takoriarlugu, Atassut-miit takorloorparput, Nunat Avannarliit Killit
Suleqatigiiffiani ilaasortaatitaqarnerput atorlugu suliassamik aallartitsisinnaanerput.
-----------------------------------------------------------------------------------------------------------------
3. marts 2011
Inatsisartut suleriaasianni § 37, immikkoortoq 1 naapertorlugu matumuuna imaattumik Naalakkersuisunut apeqquteqarpugut:
Apeqqut: Utoqqalinersiallit ukiuisa qaffanniarneqarnerisa kingunerisaannik aalisartutut piniartutullu inuussutissarsiuteqartuarsimasut piniarnermik allagartamik annaaneqannginnissaata qulakkeerniarneqarnersoq?
(Inatsisartuni ilaasortaq Siverth K. Heilmann, Knud Kristiansen ATASSUT)
Tunngavilersuut:
Innuttaasunut ataatsimiititsinermi qaffatsinneqarpoq aarleqqutigineqarlunilu ukiuni makkunani aalisartut piniartullu nunami suliffeqalersinnaanerannut isuma sakkortusiartormat, utoqqalinersiallit ukiuisa naalakkersuinikkut qaffanneqartarnerat annertuumik isumakuluutigineqarpoq.
Pingaarnertut qulakkeerumaneqarpoq - aalisartutut piniartutullu inuunertik tamaat inuussutissarsiuteqarnerminni - utoqqalinersiassaqartitaanerup ukiuisa qummut tikinneranni, piniartutut allagartaqartarnerup annaaneqartarnera maluginiarneqartarmat.
Tunngavilersuutigineqarpoq ukiuni makkunani piniakkat aalisakkallu taamak killilersuisoqartigitillugu inuuniarnerup ilungersunarnera nangiinnarlugu, saniatigut inuussutissaqarnissartik aningaasarsiulaarsinnaanissartillu innuttaasutuut
pisinnaatitaaffeqarnissartik piniarnermut allagartat pigiinnarnissaanut naalakkersuisunut apeqquteqarnissarput kissaatigineqarpoq.
Taamatullu saaffiginnittoqarnera tunngaveqarluartutut isigalutigu matumuuna manna apeqqutitut Naalakkersuisunut akineqarnissaa siunertaralugu nassiupparput.
-----------------------------------------------------------------------------------------------------------------
3. marts 2011
Inatsisartut suleriaasianni § 37, immikkoortoq 1 naapertorlugu matumuuna imaattumik Naalakkersuisunut apeqquteqarpugut:
Apeqqut: Kujataani tuttut nuijuitsut amerliartupiluulersimasut, ilaatigullu killeqarfiup akuerisaasup avataanut pisalersimasut qanoq iliuuseqarfigineqarniarpat?
(Inatsisartuni ilaasortat: Sivert K Heilmann aamma Knud Kristiansen)
Tunngavilersuut:
Kujataani nuitsunik tuttuuteqarnissamut akuerisaallutit tuttuuteqartut tuttuutaasa nunarujussuaq "nungulerpaat" aammalu uumasuuteqarnissamut akuerisap avanaanut tuttuutaat pisalersimapput, ilaatsigut qeqertat avalliit angusalersimallugit. Taakkulu tuttut uumasuuteqarfiup avataanut pisimasut qanoq iliorneqarsinnaapat? Pisarineqarsinnaappat?
-----------------------------------------------------------------------------------------------------------------
3. marts 2011
Inatsisartut suleriaasianni § 37, immikkoortoq 1 naapertorlugu matumuuna imaattumik Naalakkersuisunut apeqquteqarpugut:
Apeqqut: Kangerlussuup sineriaata ilaani "Tatsip Ataani" kikkunnik takornarialerisut qamutit motoorillit atorlugit angalasoqarsinnaanera akuerineqarsimanersoq?
(Inatsisartuni ilaasortat, Siverth K. Heilmann, Knud Kristiansen, ATASSUT)
Tunngavilersuut:
Innuttaasunut ataatsimiititsinermi paasitinneqarpugut, siorna 2010-ip ukiaani Kangerlussuup nunataani "Tatsip Ataani" takornarialerisut naammattoorneqarsimasut, qamutit motoorillit "4-hjulinik" taaneqartartut atorlugit ingerlarsoqattaartut.
Ilisimaneqartutuut nuna tamanna qangarsuarniilli aavartartutoqarsuarnik aasivigineqartarluni manna tikillugu najorneqartuartoq.
Takornariat siuarsarniarlugit takornarialerisullu aningaasarsiorfissaasa annertusarneqarnissaat pissusissamisoortutut isigilluinnarparput, taamaattorli susassaqartut tamaasa peqatigilluinnarlugit paaseqatigiiffiullunilu pilersaarusiortarnissaa saneqqunneqarsinnaanngitsoq naqissuserusullugu.
Taamaattumik ATASSUT-miit paaserusupparput, qulaani qamutit motoorillit atorlugit angalaarnermi kikkut akuersissummik tunniussaqarsimanersut? Tusakkammi malillugit piniartut peqatigiiffiat nunaqarfinni aqutsisut il.il. tusarniarneqarsimanngillat.
-----------------------------------------------------------------------------------------------------------------
3. marts 2011
Inatsisartut suleriaasianni § 37, immikkoortoq 1 naapertorlugu matumuuna imaattumik Naalakkersuisunut apeqquteqarpugut:
Apeqqut: Kangaamiuni illorsuaq B 221 inuerunnikoq qanoq piniarneqarnersoq?
(Inatsiartuni ilaasortat, Siverth K. Heilmann, Knud Kristiansen, ATASSUT)
Tunngavilersuut:
Kangaamiuni innuttaasunut ataatsimiititsinermi januar-ip qiteqqunnerata missaani 2011 tikinneqarpoq, Kangaamiuni illorsuaralammik taaneqartartup B 221 1950-sikkut naalernerata miss. sananeqartup massakkullu inigineerutivissimasup Naalakkersuisuniit qanoq piniarneqarnersoq ATASSUT-mit tusarusupparput.
Nalunngilarput Kangaamiut inissisimanerat pissutigalugu nunaminertamik pisariaqartitsineq annertusoq, taamaattumik Naalakkersuisunut apeqqutigerusupparput illorsuaralak isaterniarneqarnersoq allamillu sanaffigineqarnissaanut eqqarsaatersortoqarnersoq?
-----------------------------------------------------------------------------------------------------------------
3. marts 2011
Inatsisartut suleriaasianni § 37, immikkoortoq 1 naapertorlugu matumuuna imaattumik Naalakkersuisunut apeqquteqarpugut:
Apeqqut: Innuttaasut inatsisitigut illersorneqarnerat sumut killippa?
(Inatsisartuni ilaasortat, Siverth K. Heilmann, Knud Kristiansen, ATASSUT)
Tunngavilersuut:
Ajoraluartumik pisortat ingerlatsiviini ulloq manna tikillugu innuttaasut kiffartuunneqarnerat sullinneqarnerallu inatsisitigut pisussaaffeqareeraluartoq naammagineqanngitsoq tusartuartarparput.
Matumani assersuutitut taarusupparput, ilaqutariit akornanni erniusoq toqukkut qimagunnerata kingornagut, angajoqaat utoqqalisut Tele Greenland-imiit oqarasuaammut akiligassanik nassinneqartuarneq pisusissamisoortutut isiginneqanngilaq.
Taamatut pisoqartarsimanera ajuusaarnarpoq pissusissamisooranilu, tassami ilaqutariinni toqusoqartillugu eqqartuussiviit aqqutigalugit kingornussassat akiligassat il.il. inaarsarneqarlutillu suliarineqartarmata.
ATASSUT-miit soqutigaarput apeqqut qulaani qulequttap nangeqqiattumik pisoqartannginnissaa qulakkeerniarlugu Naalakkersuisut qanoq apeqqummut akissuteqarnissaat tusassalllugu.
-----------------------------------------------------------------------------------------------------------------
3. marts 2011
Inatsisartut suleriaasianni § 37, immikkoortoq 1 naapertorlugu matumuuna imaattumik Naalakkersuisunut apeqquteqarpugut:
Apeqqut: Nunatta ilisimatusarfigineqarnerani aningaasarpassuit atorlugit ilisimatuut ilinniartussaminnillu nassarlutik nunatsinniittartut, qanoq Naalakkersuinikkut nunatsinneersuniik ilisimasat pigiinnarnissaanut qulakkeerinninniarnersut?
(Inatsisartuni ilaasortat, Siverth K. Heilmann, Knud Kristiansen ATASSUT)
Tunngavilersuut:
Ataatsimiititsisarnitsinni uparuarneqartartunut ilaavoq, nunatta avataaneersunik ilisimatusarfigineqarnerata taakkulu namminneq ilinniartussaminnik nassarlutik aningaasarpassuillu atorlugit nunatsinniittarsimasut tusarsaajuarneri pingaartumik ilinniartunik maluginiarneqarluartarsimavoq.
Inatsisartuni politikkikkullu sulinitsinni soqutigisarilluinnartariaqarparput, nammineq uvagut illinniarfigut atorluaannarneqaratik aamma ilisimasassat pigiinnarnissaannut qulakkeerutaasinnaasunik politikkikkut suliniarnitsinni aqqutissat sukateriffigineqanngikkunik eqaallisartuarneqarnissaat, taamaalliluta siunissami inuusuttatta kingulissatsinnullu suliniarnerminni periarfissaasa annertusartuarnissaat.
Taamaattumik qulaani qulequttamut Naalakkersuisut qanoq akissuteqarsinnaanerat tusarusupparput, nalilersinnaajumallugu ukiamut inatsisartunut aalajangiiffisassamik siunnersuuteqarsinnaanissaq.
-----------------------------------------------------------------------------------------------------------------
3. marts 2011
Inatsisartut suleriaasianni § 37, immikkoortoq 1 naapertorlugu matumuuna imaattumik Naalakkersuisunut apeqquteqarpugut:
Apeqqut: Maniitsumi aatsitsiviliortoqarsinnaaneranut atatillugu avataani suliartorsinnaasut aningaasarsiakitsutullu taaneqartartut, suliffeqarfissuup Alcoa-p sanaartornerup nalaanniinnarluunniit atorumaannassagaluarpagit unittoortoqarsinnaneratalu kingunerisaannik pisoqassagaluarpat, qanoq Naalakkersuisut inatsisartunut sulisitsisunullu eqqarsaatersornerminnik takorluugaqarpat?
(Inatsisartuni ilaasortat: Sivert K Heilmann aamma Knud Kristiansen)
Tunngavilersuut:
Taamatut aperisariaqalernermut tunngaviuneruvoq maluginiartaratsigu sulisitsisut kattuffiiniit ornigineqanngilluinnartoq, erngup nukiliorfiliornissani Maniitsup Timaani Nuuk-llu kangerluani matumalu kingornagut aatsitsiviup sanananerata nalaani assigiinngitsumik akissarsiaqartitsisinnaanerup atuutilersinneqarsinnaanera.
Qularutigineqassanngilaq nunaqavissut sulisinnaasut sulerusuttullu amerlanerpaat sanaartornerup aallartinneraniilli peqataatinneqarnissaannullu ATASSUT-miit tapersersorneqarnissaat, nalunngisarpulli aana, nunatsinni suliffissaaleqisut tamaasaluunniit atoraluarutsigit amigarluinnarput.
Sanaartornermi ilisimasat pigineqarnissaat pingaaruteqarluinnarmat nunatsinniit peqataatitaqarnissarput assertuussutigisinnaanngilarput. Suliffeqarfissuup Naalakkersuisullu inatsisartut tunuliaqutaralugit isumaqatigiinniartartuisa -
isumaqatigiissinnaannginnermik kinguneqassagaluarpat - paaseqatigiissinnaanerlu sillimaffiginiarlugu anguniarlugulu - ukiut tallimat missaani sanaartorneq aallartissagaluarpat aaqqiangiinngittoqarsinnaanera akimmiffiulersinnaapput - kiisalu suliffissat aningaasarsiorfissallu ukiuni 70 - 100 tungaannut ataavartut annaanniarneqarsinnaanissaanut Naalakkersuisut (plan A imall. plan B - C) pilersaaruteqarnersut tusassallugit.
Aatsitsiviliortoqarsinnaaneranut akerliusut tapersersuisullu Maniitsumi peqatigiiffeqalernikuupput, neriuutigaarpullu innuttaasut killiffimmik paasisitsiniaaffigineqartarnerannut pitsaasumut, taakku ilanngullugit suleqatigilluarneqarumaartut.